Университеттер академиялық адалдық жүйесін қалай қалыптастырады: Есіл университетіндегі семинар

13–14 қаңтар күндері Есіл университетінде университеттерде академиялық адалдықты институционалдандыруға арналған «Akademiialyq Adaldyq Ligasy» екі күндік семинары өтті. Оқытуға университет басшылығының өкілдері, профессор-оқытушылар құрамы және әкімшілік персонал қатысты.

Семинар академиялық адалдықты абстрактілі этикалық ұғым ретінде емес, университеттің үдерістеріне кіріктірілген, басқарылатын жүйе ретінде практикалық тұрғыда қарастыруға бағытталды.

Бірінші күн: тәуекелдерді басқару және университет қауымдастығының рөлі

Бірінші күн аясында қатысушылар төмендегі мәселелерді қарастырды:

• - академиялық адалдықтың институционалдық деңгейі және оның университетті басқару жүйесіндегі орны;

• - Академиялық адалдық лигасының мониторингі қағидаттары мен логикасы;

• - академиялық адалдық саласындағы ЖОО-ларға тән тәуекелдер мен қателіктер;

• - академиялық адалдықтың тұрақты мәдениетін қалыптастырудағы әкімшілік, оқытушылар мен студенттердің рөлі.

   

Күннің негізгі бөлігі практикалық тапсырмаларға арналды. Қатысушылар өз университеттеріндегі академиялық адалдыққа қатысты тәуекел аймақтарын анықтап, ЖОО-ның тәуекелдер профилін қалыптастырды, басқару блогына экспресс-аудит жүргізді, плагиатқа төзімділікті арттыру мақсатында оқу тапсырмаларын қайта жобалады, сондай-ақ академиялық адалдықты ілгерілетуге бағытталған студенттік бастамаларды әзірледі.

Екінші күн: саясаттар, коммуникация және тиімділікті бағалау

Семинардың екінші күні келесі мәселелерге басымдық берілді:

• - әкімшілік персоналды тарту және қолдау, оқыту және ынталандыру жүйелері;

• - білім беру және коммуникация — қатысушылар университет сайттарында арнайы бөлімдер құруды қоса алғанда, академиялық адалдықты ілгерілетуге арналған коммуникациялық жоспарлар әзірледі;

• - академиялық адалдықты бұзу жағдайларына ден қою саясаттары мен рәсімдерін талдау, нақты кейстер мен ар-намыс кодексін қарастыру;

• - зерттеу және бағалау — негізгі көрсеткіштер мен дереккөздерді айқындай отырып, академиялық адалдықты бағалаудың үш жылдық жоспарын қалыптастыру.

Қатысушылар үшін Қазақстан Республикасы Ғылым және жоғары білім министрлігінің өкілі — Акерке Абылайханның қатысуы ерекше құнды болды. Ол Академиялық адалдық лигасымен ынтымақтастық бағыттары туралы айтып, жоғары білім беруде академиялық адалдық мәдениетін жүйелі түрде ілгерілетудің маңыздылығын атап өтті.

Семинардың екі күні белсенді пікірталастар, командалық жұмыс және университеттер бетпе-бет келетін нақты сын-қатерлер туралы ашық диалог форматында өтті.

Академиялық адалдық лигасы Есіл университетіне, университет басшылығына Аяпберген Таубаевтың тұлғасында, сондай-ақ барлық қатысушыларға белсенділігі, кәсіби қызығушылығы және өзгерістерге дайын болғаны үшін алғыс білдіреді.

Бөлісу: